მედიაკონკურსი
საქართველოს სახალხო დამცველი აცხადებს კონკურსს ჟურნალისტებისთვის თემაზე – "ტოლერანტობა და მრავალფეროვნება". კონკურსის ორგანიზატორია სახალხო დამცველთან არსებული ტოლერანტობის ცენტრი გაეროს განვითარების პროგრამის (UNDP) მხარდაჭერით. კონკურსის მონაწილეებმა უნდა წარმოადგინონ 2012 წლის 01 იანვრიდან 22 ოქტომბრამდე საქართველოს ტერიტორიაზე მედია სივრცეში გავრცელებული:
- პერიოდულ (ყოველდღიური, ყოველკვირეული, ყოველთვიური) გაზეთში, ჟურნალში ან ინტერნეტ სივრცეში გამოქვეყნებული სტატია;
- სატელევიზიო და ინტერნეტ სიუჟეტები;
რომელიც უნდა უკავშირდებოდეს შემდეგ თემატიკას:
- საქართველოს ეთნოსთაშორის და/ან რელიგიათშორის ურთიერთობებს;
- საქართველოს ეთნოსებისა და/ან მოქმედი რელიგიების ყოველდღიურობას, კულტურასა და თავისებურებებს;
- ქვეყანაში ეთნიკური და/ან რელიგიური ტოლერანტული კულტურის განვითარების ხელშეწყობას;
- ეთნიკური და/ან რელიგიური უმცირესობების მდგომარეობას საქართველოში;
- საზოგადოებაში ეთნიკურ და/ან რელიგიურ ნიადაგზე შეუწყნარებლობის, ქსენოფობიის, დისკრიმინაციის პრობლემას;
- საზოგადოებაში რელიგიური და/ან ეთნიკური ნიშნით დამკვიდრებული ნეგატიური სტერეოტიპების კრიტიკულ ანალიზს;
- საზოგადოებაში ეთნიკურ და/ან რელიგიურ ნიადაგზე შეუწყნარებლობასთან, დისკრიმინაციასთან, ქსენოფობიასთან და ექსტრემიზმთან ბრძოლის საერთაშორისო გამოცდილებასა და მის ასახვას საქართველოში;
- სახელმწიფოსა და რელიგიური და ეთნიკური ჯგუფების ურთიერთობათა სხვადასხვა ასპექტებს.
პუბლიკაცია ან სიუჟეტი საზოგადოებაში ტოლერანტული გარემოს განვითარებას, მრავალფეროვნების კულტურის პატივისცემასა და ზემოჩამოთვლილ საკითხებზე დისკუსიის ინიცირებას უნდა უწყობდეს ხელს.
სტატიის მოცულობა უნდა იყოს არანაკლებ 800 სიტყვისა.
სატელევიზიო სიუჟეტის ხანგრძლივობა არ უნდა აღემატებოდეს 10 წუთს.
კონკურსში გამარჯვებული სტატიის და სატელევიზიო სიუჟეტის ავტორს გამოავლენს სახალხო დამცველის მიერ მოწვეული სპეციალური კომისია.
გამარჯვებულები დაჯილდოვდებიან სპეციალური სიგელებითა და პრიზებით.
კონკურსში მონაწილეობის მსურველებმა სატელევიზო სიუჟეტი უნდა მოგვაწოდონ დისკზე (CD) ჩაწერილი, სიუჟეტის გაშვების თარიღის, მედია საშუალების და ავტორის მითითებით, ხოლო გაზეთის/ჟურნალის/ინტერნეტ სტატიის გამოქვეყნებულ ორიგინალურ ვერსიასთან ერთად უნდა მოგვაწოდონ სტატიის ელექტრონული ვარიანტიც, მისამართზე: თბილისი, ნინო რამიშვილის 6, სახალხო დამცველის ოფისი, ტოლერანტობის ცენტრი.
მოწოდებულ მასალას აუცილებლად თან უნდა ახლდეს ავტორის საკონტაქტო ინფორმაცია: ტელეფონის ნომერი და ელექტრონული ფოსტის მისამართი.
საკონკურსო მასალის შემოტანის ბოლო ვადაა 2012 წლის 22 ოქტომბერი.
